ਤਾਜਾ ਖਬਰਾਂ
ਦੇਸ਼ ਭਰ ਵਿੱਚ ਵਿਕਣ ਵਾਲੀਆਂ ਦਵਾਈਆਂ ਦੀ ਗੁਣਵੱਤਾ ਨੂੰ ਲੈ ਕੇ ਕੇਂਦਰੀ ਸਿਹਤ ਮੰਤਰਾਲੇ ਨੇ ਇੱਕ ਚਿੰਤਾਜਨਕ ਰਿਪੋਰਟ ਜਾਰੀ ਕੀਤੀ ਹੈ। ਮੰਤਰਾਲੇ ਵੱਲੋਂ ਦਸੰਬਰ 2025 ਵਿੱਚ ਜਾਰੀ ਕੀਤੇ ਗਏ ਅੰਕੜਿਆਂ ਅਨੁਸਾਰ, ਕੁੱਲ 167 ਦਵਾਈਆਂ ਦੇ ਨਮੂਨੇ ਮਿਆਰੀ ਗੁਣਵੱਤਾ (Standard Quality) ਦੇ ਪੈਮਾਨਿਆਂ 'ਤੇ ਖਰੇ ਨਹੀਂ ਉਤਰੇ ਅਤੇ ਫੇਲ੍ਹ ਪਾਏ ਗਏ ਹਨ। ਕੇਂਦਰੀ ਡਰੱਗ ਏਜੰਸੀ ਹਰ ਮਹੀਨੇ ਇਨ੍ਹਾਂ ਦਵਾਈਆਂ ਦੀ ਗੁਣਵੱਤਾ ਦੀ ਜਾਂਚ ਕਰਦੀ ਹੈ ਤਾਂ ਜੋ ਲੋਕਾਂ ਦੀ ਸਿਹਤ ਨਾਲ ਖਿਲਵਾੜ ਨਾ ਹੋਵੇ।
NSQ ਸ਼੍ਰੇਣੀ ਵਿੱਚ ਰੱਖੀਆਂ ਗਈਆਂ ਦਵਾਈਆਂ
ਕੇਂਦਰੀ ਡਰੱਗ ਸਟੈਂਡਰਡ ਕੰਟਰੋਲ ਆਰਗੇਨਾਈਜ਼ੇਸ਼ਨ (CDSCO) ਨੇ ਦੱਸਿਆ ਕਿ ਕੇਂਦਰੀ ਲੈਬਾਰਟਰੀਆਂ ਵਿੱਚ ਵੱਖ-ਵੱਖ ਕੰਪਨੀਆਂ ਦੀਆਂ 74 ਦਵਾਈਆਂ ਨੂੰ 'ਘਟੀਆ ਗੁਣਵੱਤਾ' (NSQ) ਪਾਇਆ ਗਿਆ ਹੈ, ਜਦਕਿ ਰਾਜਾਂ ਦੀਆਂ ਡਰੱਗ ਟੈਸਟਿੰਗ ਲੈਬਾਰਟਰੀਆਂ ਨੇ 93 ਹੋਰ ਦਵਾਈਆਂ ਦੇ ਨਮੂਨਿਆਂ ਨੂੰ ਮਿਆਰਾਂ ਤੋਂ ਹੇਠਾਂ ਪਾਇਆ ਹੈ। ਇਨ੍ਹਾਂ ਦਵਾਈਆਂ ਦੀ ਪੂਰੀ ਸੂਚੀ CDSCO ਦੇ ਅਧਿਕਾਰਤ ਪੋਰਟਲ 'ਤੇ ਜਾਰੀ ਕਰ ਦਿੱਤੀ ਗਈ ਹੈ।
ਬਾਜ਼ਾਰ 'ਚ ਨਕਲੀ ਦਵਾਈਆਂ ਦਾ ਜਾਲ
ਜਾਂਚ ਦੌਰਾਨ ਨਾ ਸਿਰਫ਼ ਗੁਣਵੱਤਾ ਘੱਟ ਪਾਈ ਗਈ, ਸਗੋਂ ਵੱਡੀ ਮਾਤਰਾ ਵਿੱਚ ਨਕਲੀ ਦਵਾਈਆਂ ਵੀ ਫੜੀਆਂ ਗਈਆਂ ਹਨ।
ਗ਼ਾਜ਼ੀਆਬਾਦ ਤੋਂ ਚਾਰ ਦਵਾਈਆਂ ਦੇ ਨਮੂਨੇ ਨਕਲੀ ਪਾਏ ਗਏ।
ਅਹਿਮਦਾਬਾਦ (FDA), ਬਿਹਾਰ ਅਤੇ ਮਹਾਰਾਸ਼ਟਰ ਤੋਂ ਵੀ ਇੱਕ-ਇੱਕ ਨਮੂਨਾ ਨਕਲੀ ਨਿਕਲਿਆ। ਇਹ ਦਵਾਈਆਂ ਵੱਡੀਆਂ ਕੰਪਨੀਆਂ ਦੇ ਬ੍ਰਾਂਡ ਨਾਵਾਂ ਦੀ ਵਰਤੋਂ ਕਰਕੇ ਗਲਤ ਤਰੀਕੇ ਨਾਲ ਵੇਚੀਆਂ ਜਾ ਰਹੀਆਂ ਸਨ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਸ ਮਾਮਲੇ ਵਿੱਚ ਕਾਨੂੰਨੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ।
ਨਿਯਮਤ ਜਾਂਚ ਅਤੇ ਸਖ਼ਤੀ
ਸਿਹਤ ਮੰਤਰਾਲੇ ਨੇ ਆਪਣੇ ਬਿਆਨ ਵਿੱਚ ਕਿਹਾ ਹੈ ਕਿ ਨਕਲੀ ਅਤੇ ਘਟੀਆ ਦਵਾਈਆਂ ਦੀ ਪਛਾਣ ਕਰਨ ਦੀ ਇਹ ਮੁਹਿੰਮ ਹਰ ਮਹੀਨੇ ਰਾਜ ਦੇ ਰੈਗੂਲੇਟਰਾਂ ਨਾਲ ਮਿਲ ਕੇ ਚਲਾਈ ਜਾਂਦੀ ਹੈ। ਇਸ ਦਾ ਮੁੱਖ ਉਦੇਸ਼ ਨਕਲੀ ਦਵਾਈਆਂ ਦੇ ਨੈੱਟਵਰਕ ਨੂੰ ਤੋੜਨਾ ਅਤੇ ਅਜਿਹੀਆਂ ਦਵਾਈਆਂ ਨੂੰ ਬਾਜ਼ਾਰ ਵਿੱਚੋਂ ਹਟਾਉਣਾ ਹੈ।
ਮਾਹਿਰਾਂ ਨੇ ਲੋਕਾਂ ਨੂੰ ਸਲਾਹ ਦਿੱਤੀ ਹੈ ਕਿ ਦਵਾਈਆਂ ਖਰੀਦਣ ਸਮੇਂ ਚੌਕਸ ਰਹਿਣ ਅਤੇ ਸਿਰਫ ਰਜਿਸਟਰਡ ਮੈਡੀਕਲ ਸਟੋਰਾਂ ਤੋਂ ਹੀ ਦਵਾਈਆਂ ਦੀ ਖਰੀਦ ਕਰਨ।
Get all latest content delivered to your email a few times a month.
